ఏలూరు జిల్లా

ఆంధ్రప్రదేశ్ రాష్ట్రంలో అత్యంత సంపన్నమైన జిల్లాలలో ఒకటిగా విరాజిల్లుతున్న ఏలూరు, కేవలం ఆర్థికంగానే కాకుండా ప్రకృతి, సంస్కృతి మరియు ఆధ్యాత్మికత పరంగానూ ప్రత్యేకమైన గుర్తింపును కలిగి ఉంది. ఒకవైపు విస్తారమైన వ్యవసాయ భూములు, చేపల చెరువులు మరియు ఉద్యాన పంటలతో కళకళలాడుతూ, మరోవైపు తూర్పు కనుమల శ్రేణులలో పరుచుకున్న దట్టమైన అడవులు, పాపికొండల యొక్క అద్భుతమైన అందాలు పర్యాటకులను మైమరపిస్తాయి. జీవనది అయిన గోదావరి ఈ ప్రాంతానికి జీవనాధారంగా నిలుస్తుండగా, నిర్మాణంలో ఉన్న పోలవరం ప్రాజెక్ట్ మరియు పట్టిసీమ ఎత్తిపోతల పథకం సాగునీటిని అందిస్తూ సస్యశ్యామలం చేస్తున్నాయి.

ప్రపంచానికి అంతగా పరిచయం లేని ముంజులూరు మరియు ఉప్పరిల్లు జలపాతాల సహజ సౌందర్యం, సుందరమైన ఎర్రకాల్వ జలాశయం ప్రకృతి ప్రేమికులకు ఒక ప్రత్యేక అనుభూతినిస్తాయి. దట్టమైన అడవిలో కొలువై ఉన్న గుబ్బలమంగమ్మ గుడి, పారిజతగిరీ మరియు మద్ది ఆలయాలతో పాటు ద్వారకా తిరుమల వంటి ప్రసిద్ధ పుణ్యక్షేత్రాలు ఆధ్యాత్మిక చింతన కలిగిన వారిని ఆకర్షిస్తాయి. చారిత్రక ప్రాధాన్యత కలిగిన వేంగి చాళుక్యుల రాజధాని పెదవేగి మరియు జీలకర్ర గూడెం బౌద్ధ క్షేత్రం ఈ ప్రాంతపు గొప్ప గత వైభవాన్ని తెలియజేస్తాయి. ఆసియాలోనే అతి పెద్ద మంచి నీటి సరస్సుల్లో ఒకటైన కొల్లేరు పక్షి ప్రేమికులకు స్వర్గధామం. తమ్మిలేరు జలాశయం మరియు కృష్ణా గోదావరి కాలువల సంగమం ఈ ప్రాంతపు భౌగోళిక ప్రాముఖ్యతను చాటుతాయి. అంతేకాకుండా, ఇక్కడి గిరిజన సంస్కృతి మరియు నూజివీడు జమీందారు గారి కోట వంటి చారిత్రక నిర్మాణాలు ఈ ప్రాంతానికి ప్రత్యేకమైన గుర్తింపును తెచ్చిపెడుతున్నాయి. ఏజెన్సీ ప్రాంతాలలోని సహజ అందాలు మరింత అద్భుతంగా ఉంటాయి.